ពេលចេញមកពីបក្សសមរង្សីុ ខ្ញុំប្រាប់គេថា ខ្ញុំហ៊ានចេញមកធ្វើនយោបាយតែម្នាក់ឯងព្រោះខ្ញុំអាងថាខ្ញុំមានបេះដូងមួយដែលអ្នកនយោបាយផ្សេងទៀតគ្មានទាល់តែសោះ។ គេស្តាប់ពាក្យខ្ញុំនិយាយហើយគេមិនតបនឹងខ្ញុំទេ តែគេស្ទើរតែយល់ថាខ្ញុំនិយាយដូចមនុស្សឆ្កួត និយាយគ្មានទិសតំបន់រកយល់មិនបាន តែសំរាប់ខ្ញុំ ខ្ញុំមានទំនុកចិត្តខ្លាំងណាស់ទៅលើការយល់របស់ខ្លួន ខ្ញុំរំលឹកខ្លួនឯងថាគេមិនយល់ពីខ្ញុំមិនមែនជាបញ្ហាទេ តែវាជារឿងសំខាន់និងចាំបាច់ណាស់ដែលខ្ញុំត្រូវតែយល់ពីខ្លួនឯង។ ខ្ញុំបានគិតយ៉ាងល្អិតល្អន់ពីរឿងបេះដូងដែលខ្ញុំមាន ដែលជាបេះដូងស្រឡាញ់ ឈឺឆ្អាលខ្វល់ខ្វាយ ពិតឥតក្លែងក្លាយដែលខ្ញុុំុមានចំពោះមនុស្សខ្មែរ។ ខ្ញុំគិតថានេះជាបេះដូងក្រុមគ្រួសារ ខ្ញុំជាប់ជំពាក់ចិត្តនឹងខ្មែររហូតលែងមើលឃើញតំណែងជាតំណាងរាស្ត្រដែលខ្ញុំមាននៅពេលនោះថាសំខាន់ទៀតហើយ។ ចិត្តដែលខ្វល់ខ្វាយនឹងសុខទុក្ខមនុស្សខ្មែរបានអោយខ្ញុំកំណត់ច្បាស់ថា បើខ្ញុំចង់រក្សាតំណែងតំណាងរាស្ត្រ គឺច្បាស់ណាស់ថាខ្ញុំមិនអាចជួយខ្មែរបានទេព្រោះខ្ញុំច្បាស់ណាស់ថាគណបក្សសមរង្សីុ មិនមែនជាគណបក្សស្រឡាញ់ជាតិពិតប្រាកដទេ ហើយក៏មិនអាចកែបក្សនេះអោយមកស្រឡាញ់ស្មោះត្រង់នឹងជាតិបានដែរ។ គិតហើយគិតទៀតឃើញមានតែផ្លូវចេញពីបក្សសមរង្សីុមកបង្កើតបក្សថ្មីតែមួយគត់ដែលជាមធ្យោបាយជួយជាតិបាន។
បើចេញមកតែម្នាក់ឯងយ៉ាងនេះ តើនឹងធ្វើម៉េចទៅដើម្បីឈ្នះយកការទុកចិត្តពីពលរដ្ឋអោយគ្រប់ចំនួនកំណត់បានទៅ?
ខ្ញុំគិតថាមានតែបេះដូងគ្រួសារទេដែលរុញច្រានអោយមានភាសាគ្រួសារ និងសកម្មភាពគ្រួសារ រឿងនេះ វាគ្រាន់តែចាំពេលវេលាមួយគ្រប់គ្រាន់តែប៉ុណ្ណោះ កាលណាមានពេលវេលាគ្រប់គ្រាន់ ពលរដ្ឋនឹងពាល់ត្រូវថានេះគឺជាបេះដូងមហាគ្រួសារខ្មែរដែលពួកគាត់ត្រូវការ។ មានតែបេះដូងគ្រួសារទេដែលអាចបង្កើតបានជាមហាគ្រួសារ កាលណាបង្កើតបានជាគ្រួសារ ចលនានោះ ប្រទេសនោះនឹងរឹងមាំណាស់គ្មានអ្វីមកបំបែកបានទេ ខ្ញុំយល់ ហើយនិងជឿជាក់ថាអីចឹង។
ខ្ញុំគិតទៀតថាគេមិនអាចមានបេះដូងអាត្មានិយម គ្រួសារ បងប្អូនខ្លួនឯងនិយម មកបង្កើតចលនានយោបាយ ឬប្រទេសមួយដែលមានលក្ខណ:ជាគ្រួសារបានទេ នេះជាសច្ចៈធម៌។ ត្រង់ចំណុចនេះខ្ញុំឆ្លៀតនិយាយរឿងមនុស្សខ្លះដែលចាកចេញពី LDP ពីព្រោះពួកគេមិនអាចទទួលយករបៀបដឹកនាំបក្សបែបជាការដឹកនាំគ្រួសាររបស់ខ្ញុំបានបន្តិច។ ពួកគេដែលមានបេះដូងតូច ពួកគេមានបេះដូងស្រោបតែគ្រួសារពួកគេ ហើយពួកគេចង់យករបៀបដឹកនាំបែបអ្នកដទៃនឹងគ្នា មកអោយខ្ញុំធ្វើតាម។ ខ្ញុំមានបេះដូងគ្រួសារ ខ្ញុំត្រូវតែដឹកនាំបក្សមួយនេះតាមរបៀបដឹកនាំគ្រួសារ។ ការដឹកនាំគ្រួសារមួយត្រូវប្រើការទុកចិត្តជាជាងការប្រើរចនាសម្ព័ន្ធដែលរៀបចំឡើងតាមរបៀបមិនទុកចិត្តគ្នា។ គេរៀបចំប្រព័ន្ធព្រោះគេមិនទុកចិត្តគ្នា ឬគេមិនទុកចិត្តគ្នាបានជាគេរៀបចំអោយចេញជាប្រព័ន្ធតាមដានការងារគ្នា។ ការយកប្រព័ន្ធបែបមិនទុកចិត្តគ្នាគឺប្រព័ន្ធបែបដឹកនាំក្រុមហ៊ុន ដឹកនាំអង្គការ ដឹកនាំបក្សដែលមិនមានលក្ខណ:គ្រួសារ ឬរបៀបដឹកនាំរដ្ឋមួយយកមកប្រើក្នុងក្រុមមួយដែលមានលក្ខណៈគ្រួសារ គឺជាការបំបែកបេះដូងគ្រួសារនោះអោយចេញជាបេះដូងអ្នកដទៃនឹងគ្នា នេះជាសច្ចៈធម៌។
បក្សនយោបាយមួយដែលមានលក្ខណៈជាគ្រួសារមិនងាយស្រួលក្នុងការបង្កើតទេ តែបើបង្កើតបានហើយគឺវារឹងមាំណាស់ មិនងាយនឹងបំបែកបានទេ យើងត្រូវតែយល់ត្រង់ចំណុចនេះ។ បេះដូងខ្ញុំ ជាបេះដូងគ្រួសារ ចេញពីបេះដូងនេះ ខ្ញុំបានបង្កើតចលនានយោបាយមួយដែលមានលក្ខណៈគ្រួសារ។ ជាគ្រួសារ ដាច់ខាតគឺប្រើការទុកចិត្តជាងការប្រើប្រព័ន្ធតាមដានដែលកើតឡើងពីបេះដូងដែលមិនទុកចិត្តគ្នា អោយតែអ្នកដឹកនាំប្រើប្រព័ន្ធតាមដានបែបមិនទុកចិត្តគ្នា នោះបេះដូងគ្រួសារនឹងរងរបួសភ្លាម ហើយចលនានយោបាយមួយដែលមានលក្ខណៈគ្រួសារត្រូវបែកបាក់មកនៅត្រឹមតែជាបក្សនយោបាយមួយតែប៉ុណ្ណោះ ហើយចលនានយោបាយនោះនឹងមិនរឹងមាំដូចចលនានយោបាយដែលមានលក្ខណៈគ្រួសារទេ។ ព្រោះតែខ្ញុំស្គាល់ចលនានយោបាយដែលខ្ញុំបានបង្កើតនិងកំពុងដឹកនាំច្បាស់ដូចស្គាល់បាតដៃខ្លួនឯងនេះហើយ ទើបខ្ញុំតែងតែរំលឹកអ្នកចូលរួមនឹង LDP ថាចាំអ្នកស្គាល់ខ្ញុំច្បាស់ហើយមានការទុកចិត្តខ្ញុំដូចជាទុកចិត្តក្រុមគ្រួសារអ្នកសិនចាំអ្នកចូលរួមជាពិសេសរឿងចូលលុយមក LDP បើអ្នកមិនទាន់ទុកចិត្តខ្ញុំដូចទុកចិត្តសមាជិកគ្រួសារអ្នកទេ សូមអ្នកកុំចូលលុយមក LDP អី ហើយអ្នកមិនចូលលុយរហូតក៏មិនអីដែរបើអ្នកមិនទាន់ទុកចិត្តទេ ខ្ញុំនឹងមិនបន្ទោសអ្នកទេព្រោះវាជាសិទ្ធិជាសេរីភាពរបស់អ្នកដែលគ្មានអ្នកណាម្នាក់មានសិទ្ធិទៅបំពានលើសិទ្ធិសេរីភាពរបស់អ្នកបានឡើយ តែបើអ្នកសំរេចចិត្តចូលលុយហើយ កុំមកនិយាយ ឬធ្វើសកម្មភាពណាមួយបែបមិនទុកចិត្តឲ្យសោះណា ខ្ញុំប្រាប់រួចហើយថា ខ្ញុំគឺអញ្ចឹង ខ្ញុំដឹកនាំអញ្ចឹង បើមិនទុកចិត្តកុំចូលលុយឲ្យសោះបើចូលហើយ ខ្ញុំសន្មត់ថាអ្នកទុកចិត្តលើខ្ញុំហើយណា ពេលខ្ញុំដឹងថាអ្នកបានមិនទុកចិត្តខ្ញុំ ខ្ញុំសែនឈឺ។ហេតុអ្វីខ្ញុំឈឺ? ព្រោះខ្ញុំមានអារម្មណ៍ថាគ្រួសារខ្ញុំមើលងាយទឹកចិត្តខ្ញុំ។ អ្នកដទៃមិនទុកចិត្តខ្ញុំមិនជាអីទេ តែគ្រួសារខ្ញុំមិនទុកចិត្តខ្ញុំ ខ្ញុំមានអារម្មណ៍ថា គេអោយតំលៃខ្លួនគេខ្ពស់ គេអោយតំលៃលុយគេខ្ពស់ណាស់ ខ្ពស់ជាងសេចក្តីស្មោះត្រង់នឹងការលះបង់របស់ខ្ញុំទៅទៀត។ ពេលគេធ្វើអ្វីមួយដែលខ្ញុំរកឃើញថាគេមិនទុកចិត្តខ្ញុំ ខ្ញុំដឹងច្បាស់ថាគេមិនបានទុកខ្ញុំជាគ្រួសារគេទេ។ ខ្ញុំចង់និយាយទៅកាន់អ្នកនោះវិញថាអ្នកលះបង់ចំពោះចលនានេះមិនដល់ខ្ញុំទេ កុំអោយតំលៃលើលុយអ្នកខ្ពស់ហួសរហូតដល់ខ្ញុំកើតចិត្តមើលងាយអ្នកអី។ ប្រាប់ម្តងទៀតណាបើមិនទុកចិត្តកុំចូលលុយ បើចូលហើយអោយខ្ញុំដឹងថាអ្នកមិនទុកចិត្តខ្ញុំ នោះអ្នកនឹងត្រូវកាំភ្លើងធំខ្ញុំមិនខានឡើយ។
ដើម្បីអោយអ្នកកាន់តែច្បាស់ពីអារម្មណ៍ខ្ញុំ ខ្ញុំសូមលើកជាឧទាហរណ៍មួយ ថ្ងៃមួយនោះខ្ញុំបានជិះឡានទៅកំពង់សោម នៅតាមផ្លូវមានលក់ផ្លែគុយ ខ្ញុំនឹកឃ្លានគុយខ្ញុំក៏ប្រាប់ប្អូនបើកឡានអោយឈប់ទិញផ្លែគុយនោះ ដោយឡានវាជិតដល់កន្លែងលក់គុយនោះពេកហើយ ឡានត្រូវចាប់ហ្វ្រាំងយ៉ាងប្រថុចញ៉ុច ក្មេងស្រីអាយុប្រហែល១៣ឆ្នាំលាបសក់ក្រហមលាបម្សៅពេញមុខរបៀបមនុស្សស្រីធំមុនអាយុដែលជាអ្នកលក់ផ្លែគុយ វាឃើញឡានបន្ថយល្បឿនយ៉ាងគំហុកបែបនេះវាខ្លាចហួសទៅចូលកន្លែងលក់គុយផ្សេងទៀត វាក៏ស្ទុះចេញមកបក់ដៃយ៉ាងញាប់អោយឡានឈប់ខ្លាចឡានទៅហួសកន្លែងវាចូលដល់កន្លែងអ្នកលក់ផ្សេងទៀត។ ពេលឈប់ឡានភ្លាមខ្ញុំនិយាយប្រាប់អ្នកក្នុងឡានទាំងអស់គ្នាបណ្តើរចុចកញ្ចក់អោយក្មេងស្រីអ្នកលក់ថ្លឹងគុយបណ្តើរ ខ្ញុំនិយាយថាតាមមើលរបៀបតែងខ្លួននិងរបៀបបក់ដៃអោយឡានឈប់របស់ក្មេងស្រីនេះអំបាញ់មិញ អញសន្និដ្ឋានថាក្មេងស្រីនេះមានចរិតមិនល្អទេ ខ្ញុំសួរថាគុយមួយគីឡូប៉ុន្មាន នាងឆ្លើយថា ២៣០០០៛ ខ្ញុំចង្អុលថាថ្លឹងមួយចង្កោមធំនោះមក នាងថ្លឹងហើយ ពេលខ្ញុំសួរថាប៉ុន្មានគីឡូ នាងឆ្លើយថា២គីឡូកន្លះ ស្រាប់តែបងប្រុសនាងអាយុជាង២០ឆ្នាំបានរត់មកដល់រួចយកជញ្ជីងពីដៃនាងហើយថ្លឹងផ្លែគុយនោះ បន្ទាប់មកប្រាប់ខ្ញុំថា ២គីឡូ ២ខាំ។ ខ្ញុំភ្ញាក់ព្រើតមិននឹកស្មានថាក្មេងស្រីនេះបន្លំភ្នែកជញ្ជីងអញ្ចឹងសោះ ខ្ញុំក៏ស្តីអោយថា ពូថាមិនខុសទេ ឃើញរបៀបតែងខ្លួននិងចរិតបក់ដៃហៅឡានអោយឈប់ហ្នឹងដឹងតែថាក្មួយស្រីជាមនុស្សរបិញរបុញថោកទាបហ្មង ឥឡូវមែន។ ខ្ញុំនឹកស្មានថានាងអន់ចង់ហើយ ដឹងអីនាងសើចអោយកក្អឹក ឃើញហើយក្តៅឆេវ ក៏បន្តថែមទៀតថា ចរិតមនុស្សថោកទាបទាំងឡាយគឺបែបហ្នឹង ធ្វើរឿងថោកទាបពេលគេទាន់គេស្តីអោយ វាតែងតែមិនដែលឈឺចាប់ទេ គឺនៅតែអាចសើចខឹកៗធម្មតា វាមុខក្រាស់មិនចេះឈឺចាប់អីចឹងទើបអាចធ្វើរឿងថោកទាបបាន បើមនុស្សចេះឈឺគេនិយាយប៉ះច្បាស់ជាក្តៅឆេវ ហើយមិនអាចធ្វើរឿងថោកទាបបែបនេះកើតទេ។
ខ្ញុំចង់ប្រាប់គ្នាយើងដែលត្រឹមត្រូវលះបង់ច្រើន ធ្វើការហត់ ស្មោះត្រង់ ពេលអ្នកចូលលុយដែលអោយតំលៃតែលើលុយខ្លួនជាធំមើលមកគេហ្នឹងល្អស្មោះត្រង់មិនស្មើខ្លួន នោះធ្វើអោយយើងក្តៅភ្លាមចង់ប្រាប់ថាអ្នកឯងមិនល្អមិនស្មោះត្រង់មិនលះបង់ស្មើនឹងយើងទេ ប្រាប់ហើយតើចាំទុកចិត្តមានអារម្មណ៍ថាជាបងប្អូនចាំចូលលុយ បើចូលហើយនៅធ្វើឫកដូចលុយខ្លួនវាអស្ចារ្យពេក ជៀសមិនផុតពីកាណុងធំរបស់ខ្ញុំទេ នេះជាអារម្មណ៍អ្នកស្មោះ និយាយគងលើមិនបានទេ។ប្រាប់ម្តងទៀតកំុធ្វើការជាមួយមនុស្សដែលអ្នកមិនទុកចិត្តគ្មានផលល្អទេ។ សំរាប់ខ្ញុំដែលមានអារម្មណ៍ថាគ្រួសារ ខ្ញុំមើលមនុស្សមុន បើខ្ញុំមានអារម្មណ៍ថាបងប្អូនកូនក្មួយហើយទើបខ្ញុំប្រើ អីចឹងហើយបានជាដូចជាវេទិកានៅតាមខេត្តដែលប្រើលុយច្រើនៗ ខ្ញុំតែងតែរំលឹកថាបើខ្វះលុយប្រាប់មកចុះ អ្នកទទួលខុសត្រូវខេត្តខ្លះខ្ញុំសួរថាវេទិការួចនៅខ្វះលុយរៀបចំប៉ុន្មានហ្នឹង? គ្នាខ្លាចយើងសង្ស័យគ្នា គ្នានិយាយមកកាន់ខ្ញុំថា ចាំខ្ញុំផ្ញើបញ្ជីចំណាយទៅអោយបង ឬពូមើល ខ្ញុំគំហគទៅវិញថា បង ឬពូមិនត្រូវការមើលបញ្ជីចំណាយទេ ប្រាប់តែចំនួនទឹកលុយដែលត្រូវការយកទៅប្រើមកបានហើយ បើអ្នកនោះនៅតែអេះអុញចង់ផ្ញើបញ្ជីចំណូលចំណាយអោយខ្ញុំមើលទៀត ខ្ញុំតែងតែសួរថា តើប្អូន ឬក្មួយទុកពូ ឬបងនៅត្រង់ណាក្នុងខ្លួនប្អូនឬក្មួយ? បងមិនមែនជាបងជាពូ ឬជាពុកក្មួយទេឬ បានជាក្មួយផ្ញើបញ្ជីចំណូលចំណាយអោយពូបែបនេះ? តើបង ពូ ឬឪពុកប្រើប្អូន ប្រើក្មួយប្រើកូនអោយធ្វើការត្រូវការបញ្ជីចំណូចំណាយមកវិញដែរឬ? បងពូ ពុកប្រើតែមនុស្សដែលបង ដែលពូដែលពុកទុកចិត្តទេ បើមិនទុកក្នុងចិត្តថាប្អូន ក្មួយ កូនមិនមែនជាគ្រួសារទេ នោះបងពូ ពុកមិនប្រើអ្នកទាំងអស់គ្នាទេ បងពូពុក មានអារម្មណ៍ជាគ្រួសារមុនហើយទើបបងពូពុកប្រើប្អូនក្មួយនិងកូន។
ខ្ញុំរំលឹកជាញឹកញាប់អ្នកនៅតាមខេត្ត ខ្ញុំប្រាប់ថាលុយដែលអ្នកទាំងអស់គ្នាសន្សំទុកធ្វើការងារផ្សេងៗតាមខេត្ត បើបងប្អូនរបស់កូនត្រូវការដោះទាល់រឿងឯកជនក៏ដោយបើលុយនោះទំនេរសមល្មមជួយបានជួយគ្នាទៅ។ នេះជាគ្រួសារយើងបើពួកកូនមានអារម្មណ៍ថាជាគ្រួសារហើយ ម្តេចបងប្អូនកូនឈឺចាប់កូនមិនឈឺចាប់នោះ នោះមានតែកូនកុហកគេ ការពិតកូនមិនស្រឡាញ់ពួកគេជាបងប្អូនក្រុមគ្រួសារទេ តែកូនត្រូវមើលអោយច្បាស់ថាអ្នកណាជាក្រុមគ្រួសារកូន អ្នកណាមកបន្លំ បើជាគ្រួសារហើយជួយគ្នាទៅ។ នេះជារបៀបដឹកនាំបែបគ្រួសារ ព្រោះបេះដូងយើងជាបេះដូងគ្រួសារមុនទៅហើយ ម្លោះហើយរបៀបចាត់ចែងការបែបគ្រួសារនឹងមានតាមក្រោយ។ ការចាត់ចែងការរបៀបគ្រួសារនេះ សំរាប់អ្នកមានបេះដូងអាត្មានិយម ស្រឡាញ់តែសាច់ញាតិគ្រួសារខ្លួនយល់មិនបានទេ គេជំទាស់នឹងយើងរហូតហើយគេស្មានថាគេហ្នឹងល្អជាងយើងទៅទៀត ការពិតមកពីចិត្តគេ យើងមិនមែនជាគ្រួសារគេទេតែប៉ុណ្ណោះ។ ត្រូវចាំថាការបង្កើតអោយបានជាគ្រួសារក្រៅផ្ទៃមាតាមិនមែនជារឿងងាយស្រួលអ្នកណាក៏ចេះតែធ្វើបាននោះទេ មនុស្សមានបេះដូងតូចៗស្រឡាញ់តែក្រុមសាច់ញាតិគ្រួសារខ្លួនមិនអាចដឹកនាំបង្កើតក្រុមគ្រួសារក្រៅផ្ទៃបានទេ កុំថាតែគ្រួសារធំ ដឹកនាំតែក្រុមការងារមួយដែលមានគ្នា២០ទៅ៣០នាក់ក៏មិនបានផង។ ត្រូវចាំថាចលនាមួយដែលមានលក្ខណៈគ្រួសារជាចលនារឹងមាំណាស់មិនងាយស្រួលបង្កើតបានឡើយ ហើយបើមានអ្នកណាមួួយអោយយោបល់យកការដឹកនាំបែបមិនទុកចិត្តគ្នាមកដឹកនាំចលនាគ្រួសារគឺស្មើនឹងបំបែកគ្រួសារនោះអោយនៅត្រឹមតែក្រុមនយោបាយ ឬក្រុមការងារ ឬក្រុមហ៊ុនមួយប៉ុណ្ណោះ មនោសញ្ចេតនាគ្រួសារបងប្អូននឹងត្រូវកំទេចចោលដោយប្រព័ន្ធមិនទុកចិត្តគ្នានោះ។
គេច្រើននិយាយថាយើងរៀបចំប្រព័ន្ធអញ្ចឹង ទៅដើម្បីអោយមានការទុកចិត្តគ្នា មានន័យថាគេមិនទុកចិត្តគ្នាទេបានជាគេរៀបចំជាប្រព័ន្ធនោះឡើង ចំណែក LDP ខ្ញុំនិយាយថាចាំទុកចិត្តចាំចូលរួមចាំទុកចិត្តចាំចូលលុយ។ មនុស្សមានបេះដូងតូចមិនអាចបង្កើតក្រុមគ្រួសារក្រៅផ្ទៃបានទេ ព្រោះតែខ្ញុំយល់បែបហ្នឹងហើយទើបខ្ញុំចង់តែសើចនឹងមនុស្សដែលអន់ចិត្តនឹងខ្ញុំរួចចេញពី LDP ពួកគេបានទៅប្រមូលផ្តុំគ្នា ជួនកាលខ្ញុំឃើញពួកគេផុសរូបថតពួកគេទៅលេងគ្នាដល់ផ្ទះមានផ្លែឈើយួរនឹងដៃទៅជូនគ្នាហាក់ដូចជាស្រឡាញ់រាប់អានគ្នាជាគ្រួសារអីចឹង ខ្ញុំច្បាស់ណាស់ថាពួកគេទាំងនោះមានបេះដូងតូចៗណាស់ មនុស្សបេះដូងតូចដាច់ខាតមិនអាចបង្កើតគ្រួសារក្រៅផ្ទៃបានទេ ពួកគេទៅជុំគ្នាព្រោះពួកគេស្អប់ខ្ញុំអន់ចិត្តនឹងខ្ញុំរួមគ្នាតែប៉ុណ្ណោះ តែពួកគេមិនមែនជាគ្រួសារនៃមនុស្សមានបេះដូងតូចទេ ព្រោះបេះដូងតូចមិនអាចបង្កើតបានគ្រួសារក្រៅផ្ទៃបានឡើយ។ អញ្ចឹង ហើយបានជាខ្ញុំសើច នឹកគិតថាមិនយូរទេពួកគេមុខតែបែកគ្នាវិញមិនខាន។ គ្មានដែលខុស ចុងក្រោយឃើញអីចឹងមែន។ នេះហើយជារឿងដែលខ្ញុំអាងលើបេះដូងខ្លួនឯងដើម្បីធ្វើនយោបាយនោះ៕
